Şahyryň dilinde watan waspy
53Türkmen halkynyň edebi taryhynda öçmejek yz galdyran Magtymguly Pyragynyň döredijiligi örän köptaraplylygy bilen tapawutlanýar. Onuň parasatly pikirleri türkmen halkynyň aňyna mäkäm ornaşyp, milletiň kalbynda milli aýdym bolup ýaňlanýar. Şahyryň dürli temadaky goşgularynyň arasynda watançylyk, gahrymançylyk, mert, edermen, goç ýigitler terbiýeläp ýetişdirmäge degişli şygyrlary uly orun tutýar. Şahyr watançylyk, gahrymançylyk temasynda “Ýaşymyz” , “Gözlär men”, “Başy gerekdir”, “Mert bolmaz” ýaly goşgulary ýazýar. Bu goşgularyň içinden watany söýmek, oňa wepaly bolmak, batyrlyk, edermenlik baradaky pikirler eriş-argaç bolup geçýär. Şahyr üçin doglan ýurdundan eziz, mähriban ýurt ýok.Ol “Mert bolmaz” goşgysynda:
“ Eşit, adam,dogan ilden,
Gaýry mähriban ýurt bolmaz”
Diýip belleýär.Ýa-da:
“Ilinden aýry düşen
Ah urar, ili gözlär”
Diýip, dogduk ýurdundan aýrylan ynsanyň gursagynyň mydama armanly aýtjakdygyny nygtaýar. Şahyr “Gadyryň näbilsin” diýen şygrynda:
“Watandan aýrylyp,ýalňyz düşmegen
Ülkesinde il gadyryn näbilsin”
Diýmek bilen öz ülkäňde, dogan-garyndaşlaryň arasynda rahat ýaşamagyň adam üçin uly hazynadygyny belleýär. Bu sözler onuň watanyny çyn ýürekden söýýändigini aňladýar.
Bilşimiz ýaly, şahyr atamyzyň ýaşan döwürleri türkmen halkynyň galagoply, içerki we daşarky söweşleriň köp bolýan zamanasy bolupdyr. Ol bu zatlara jany-teni bilen gynanyp, bu meselere çäre tapmagyň pikirinde bolupdyr. Muny ussadyň her bir goşgysynda diýen ýaly duýmak bolýar.
Türkmen halkyny ruhybelentlige, agzybirlige, jebislige çagyran beýik şahyrymyzyň arzuwlan zamanasy häzirki döwürde öz ajaýyp beýanyny tapdy.
Milli lidermiziň, Arkadagly Gahryman Serdarmyzyň aýdyň maksatlary, belent tutumlary bilen külli türkmen halkyny bir saçagyň başyna jemlendi, beýik şahyrymyzyň ajaýyp şygyrlary toýdur baýramlarymyzyň senasyna öwrüldi. Biz kalbynda Watan mukaddesligi tug edilen türkmen milletiniň agzybir, parahat ýaşaýşyny gursagynda göterip, köňlüne uly ynamy beslän akyldar şahyrmyzyň arzuwlan şol bagtly döwrüniň, bagtyýar döwrüniň şaýatlarydygyna begenýäris.
S.A.Nyýazow adyndaky TOHU-nyň
Türkmenabat agrosenagat orta hünär okuw
mekdebiniň mugallymy Akyýewa Läle
